كن كما أنت ولا تبالي..د حنان عبدالمنعم

ناس مش بتحبك…مش علشانك، لكن علشان عمرها ما فهمتك!”

في كل مرحلة في حياتك، هتقابل ناس تشوفك غلط…ناس تحكم عليك من بعيد، من نظرة، من موقف، أو من اختلاف بسيط في الطريقة أو التفكير.مش علشان انك سيء، ولا علشان انك غلط…بس لأنهم ببساطة مش قادرين يفهموك.

في ناس هتكرهك لأنها مش قادرة تسيطر عليك.
وفي ناس هتبعد عنك لأنك مش بتمشي على مقاسهم، ولا بتردّد كلامهم، ولا بتتصرف بالطريقة اللي هم شايفينها “صحيحة” من وجهة نظرهم هما… وبس!

هما عاشروك؟ لأ.
هما حاولوا يسمعوك بصدق؟ لأ. هما شافوا ظروفك؟ وجعك؟ نيتك؟
ولا حتى قربوا من روحك؟ لأ…بس قرروا إنهم يحكموا، ويتكلموا، ويبعدوا… لأنك “مش شبههم”، لأنك عندك متطلباتك الخاصة، قيمك، وأسلوبك في الحياة.

في ناس مش بتعرف تحبك إلا لو كنت نسخة منهم..ولو اختلفت؟ بقيت مرفوض. ولو طالبت بحقك؟ بقيت أناني. ولو قلت “لأ”؟ بقيت صعب ومغرور.

بس الحقيقة إن اللي ماعرفكش بعمق، ماينفعش يحكم عليك بسطحية. واللي ماعاشكش بكل تفاصيلك، ماينفعش يقولك “إنت مش كويس”. ماتحزنش من الناس دي…وجودهم اختبار، مش تقدير.
والمهم مش هم قالوا إيه، المهم أنت عارف مين؟ وعارف قد إيه نيتك كانت صافية، وقد إيه كنت بتحاول… تتفهم، وتدي، وتكون حقيقي.

اختلافك مش تهمة…
اختلافك “كنز” بيخلي لك لون، وملامح، وصوت، وشخصية مميزة.وكل حد مشي من حياتك لأنه مش قادر يعيش مع حقيقتك،
صدقني: خسارته مش خسارتك.

عيش على طريقتك،
مش لازم تعجب الكل…
المهم تعيش مرتاح مع نفسك. وبلاش اندهاش  لما تكتشف إن في ناس بتحبك بدون ما تطلب…
ناس فهموك، حتى من غير ما تشرح…لأن قلوبهم نظيفة كفاية علشان تشوفك من جوا، مش من برّا.

فافتخر بنفسك، حتى لو مش مفهوم…وما تعتذرش عن كونك “أنت”. الناس اللي تستحقك، هتشوفك زي ما أنت…وتحمد ربنا على وجودك في حياتها.

مش مطلوب ترضي الجميع ، حب نفسك الناس تحبك .وافهمني قبل ماتحكمني مش كل اللي اختلف غلط.